22-23 қараша күндері Италия астанасы – Рим қаласында “World championship Italy-Rome/2024” атты оқушылар арасында робототехникадан Халықаралық чемпионат болып өтті.
Аталған білім додасына жер жүзінің ең мықты робототехника командалары қатысып, бақ сынады. Шалғайда жатқан Шардарадағы М.Қалмырза атындағы №3 мамандандырылған мектеп-интернатының оқушылары осынау әлемдік додада Қазақстанның намысын қорғады.
Білім ордасындағы информатика пәнінің мұғалімі Маржан Саудабаеваның жетекшілігімен “Shardara team” робототехника командасының құрамындағы 11 сынып оқушылары – Лес Бағдаулет пен Бірлік Нұрдәулет Әлем бойынша 28 мемлекеттен келген командалардың арасында өткен білімділер бәйгесінде “1 kg Lego Sumo” категориясы бойынша финалға өткен бес команданың қатарынан көрініп, жүлделі орынды иеленіп қайтты.
Дүбірлі халықаралық деңгейдегі додада жүлдегер болып, мықтылардың мықтысы атанған оқушылар мен жетекшісін, қолдау көрсеткен мектеп ұжымын шын жүректен құттықтаймыз!
"Өскен өңір" – ақпарат.
