Жуырда Түркістан облыстық мәслихат депутаты Бахытжан Серманизов өткен жылы атқарған жұмыстары туралы есеп беру және тұрғындардың мәселелерін тыңдау мақсатында Шардара ауданының халқымен кездесу өткізді.
Кездесуге Түркістан облысы мәслихатының төрағасы Нұралы Әбішов, аудан әкімі Арман Қарсыбаев, аудандық мәслихат төрағасы Бұлтбай Мүталиев және депутаттар, қала, кент, ауылдық округтердің әкімдері мен орынбасарлары, аудандық дербес бөлімдердің басшылары, аудан тұрғындары мен бұқаралық ақпарат құралдарының өкілдері қатысты.
Жиын барысында облыстық мәслихат депутаты Бахытжан Серманизов 2024 жылдың қорытындысы бойынша атқарылған жұмыстар туралы баяндама жасады. Сондай-ақ, Шардара ауданына бөлініп жатқан бюджет қаражаттарының есебін беріп, тұрғындардың өтініштері мен ұсыныс-пікірлерін тыңдап, сұрақтарына жауап берді. Тұрғындар тарапынан Қ.Тұрысбеков ауылына қосымша бейнекамералар қою, ауылдық емхананың базасын кеңейту, мәдениет үйін жөндеу, Жаушықұм-Қалғансыр жолын асфальттау, Алатау батыр ауылынан спорт кешенін салуға қаржы бөлу, ҰОС ардагерлерінің атына көше беру мәселесі, ауыз су сынды мәселелер көтерілді. Халықтың талап-тілектері мұқият тыңдалып, әр мәселе бойынша толық жауап беріліп, шешу жолдарын қарастыратынын жеткізді.
Жиын барысында Түркістан облысы мәслихатының төрағасы Нұралы Әлмаханұлы қазіргі таңда Мемлекет басшысы елдің экономикасын арттыру мен өңірлерге инвестиция тартуды міндеттеп отырғанын атап өтті. Бұл ауылдардың әлеуетін арттырып, тұрғындарды тұрақты жұмыспен қамтуға және елді мекендердегі инфрақұрылымдарды жақсартуға мүмкіндік беретінін айтты. Сондай-ақ, халықты теріс ақпараттардан аулақ болып, аудан әкімдігімен бірігіп игі істерге қолдау білдіруге шақырды.
Кездесу соңында тұрғындардың талап тілегі бойынша аудан әкімдігіне тиісті ұсыныстар беріліп, хаттамасы түзілді және орындалуы депутаттар тарапынан бақылауға алынды. Жалпы, аудан халқы депутаттың жұмысын оң бағалап, алдағы істеріне сәттілік тіледі.
Өз тілшімізден.
