Шардара ауданында Ұлыстың ұлы күні – Наурыз мерекесінің онкүндігі игі істермен жалғасын тапты. 20 наурыз күні Шардара қаласындағы Әуежай алаңында «Ұлыстың ұлы күні – Наурыз!» мерекесі кең көлемде атап өтілді.
Думанды шарада аудан әкімі Арман Қарсыбаев пен аудандық ардагерлер кеңесінің төрағасы Т.Бердібеков бастаған топ алдымен аудандық дербес бөлімдер, ауыл әкімдіктері мен мемлекеттік мекемелердің тіккен киіз үйлерін аралап, ұлттық тағамдардан дәм татып, бата берді. Аралау барысында 200-ге жуық мүмкіндігі шектеулі және әлеуметтік аз қамтылған жандарға жайылған дастарқанға барып, мерекемен құттықтап, 150 жанға әлеуметтік себеттер үлестірілді.
Сондай-ақ, әр киіз үйде қазақы салт-дәстүрге тән тұсау кесер, қыз ұзату, ұршық иіру, жүн түту секілді ғұрыптарды тамашалап, қол өнер, сурет сынды көрмелермен танысты.
Қаз-қатар тігілген ақшаңқан киіз үйлерді аралап болған соң аудан әкімі Арман Қарсыбаев қалың жұртшылықты Наурыз мерекесімен құттықтады.
– Құрметті жерлестер! Сіздерді Ұлыстың ұлы күні – Наурыз мерекесімен шын жүректен құттықтаймын! Ұлыс оң болсын! Халқымыз үшін Наурыздың орны ерекше.
Наурыз – жанға шуақ, жүрекке жылулық сыйлайтын мереке.
Наурыз – жылдың басы ғана емес, жаңару мен жаңғырудың айқын белгісі. Ауданымыз жылдан жылға қарыштап дамып келеді. Биыл Шардара ауданының 60 жылдық мерейтойы да кең көлемде тойланады. Мұндағы игі істердің бәрі аудан халықының ауызбіршілігімен жүзеге асуда. Қазақ халқының қастерлі мерекесі тағы да құтты болсын. Еліміз аман, жұртымыз тыныш болсын, – деді Арман Романұлы.
Сонымен қатар, мерекеге орай мемлекеттік мекемелердің киіз үйлері мен салт-дәстүрлерге негізделген мәдени шаралары арнайы бағаланып, үздік шыққандар арнайы марапаттарға ие болды. Бұдан бөлек Наурыз мерекесін 10 күн бойы тойлау іс-шарасында белсенділік танытқан бөлімдер мен мекемелерге аудан әкімінің, мәслихат төрағасының атынан Алғыс хаттар тапсырылды.
Шардара төріндегі айрықша мерекеде концерттік бағдарлама ұсынылды.
Мерекеде Наурыз, ұлттық мәдениет пен салт-дәстүрлер мен әдет-ғұрыптар дәріптелетін әндер шырқалды. Ауданға, облыс және республикаға танымал әншілер өнер көрсетті. Киіз үйлер тігіліп, қонақтарға есігін айқара ашты.
Күндізгі сағат 10.00-де бастау алған мерекелік шара біршама уақыт жалғасып, концерттік бағдарламалар мен театрландырылған көріністер, ұлттық спорттық ойындардан, соның ішінде қазақ күресі, қол күрес, арқан тарту, асық ату, аударыспақ, теңге ілу, ләңгі тебу сынды сайыстар өткізілді.
Аудан әкімінің баспасөз қызметі.
