Кешегі аптаның соңында 8 наурыз – Халықаралық әйелдер күніне орай аудандық мәдениет үйінде «Әлемнің жарығы – Ана» атты концерттік кеш өтті.
Шараға аудан әкімі Арман Қарсыбаев, аудандық ардагерлер кеңесінің төрағасы Т.Бердібеков, аудандық мәслихат төрағасы Б.Мүталиев, сондай-ақ, дербес бөлім басшылары, аудан тұрғындары және ақ жаулықты аналар мен қыз-келіншектер қатысты.
Салтанатты кеш аналар жайлы әндермен басталып, аудан әкімі Арман Қарсыбаев құттықтау сөз сөйледі.
– Сіздерді табиғат-ана жаңарып-жасарып, мейірім шуағын молайтып, дүние түрлі түске боялатын гүл көктемнің сәулелі мерекесі – 8 Наурыз – Халықаралық әйелдер күнімен шын жүректен құттықтаймын!
Қашанда еліне тұтқа, ұрпаққа пана болған, тіршілікке нәр берген, адамзатқа өмір сыйлаған Анадан құдіретті, Анадан ардақты, Анадан аяулы жан жоқ. Тіршіліктің тірегі, отбасының берекесі, барша адамзаттың тәрбиешісі де – Ана.
«Ана бір қолымен бесікті, екінші қолымен әлемді тербетеді». Әлемнің тыныштығы, бейбітшілігі аналардың мейірімді жүрегінде, ақ пейілді тілегінде. Сондықтан мына жарық дүниеге әкелген Аналардың алдында бәріміз де бас иеміз. Мерейлі мереке қарсаңында дендеріңізге саулық, отбасыларыңызға бақ-береке, шаттық пен қуаныш тілеймін! – деді аудан әкімі.
Құттықтау сөзден соң аудан басшысы ауданның әлеуметтік-экономикалық дамуына үлес қосқан аналар мен нәзік жандыларды «Алғыс» хатпен, естелік сыйлықтармен марапаттады.
Кеш барысында «Шардара-Армспорт» клубының чемпиондары мен аудан жастары кешке келген нәзік жандыларға аудан әкімінің атынан гүл шоқтарын үлестірді.
Сонымен қатар, аудандық мәслихат төрағасы Б.Мүталиев те бірқатар нәзік жандыларды құттықтап, марапаттар тапсырды.
Кеште өнерпаздар мерекелік әсем әннен шашу шашып, ізгі тілектер айтылды.
Аудан әкімінің баспасөз қызметі.
