25 наурыз бен 2 сәуір күндері аралығында Қостанай қаласында ауыр атлетикадан ересектер арасындағы Қазақстан Республикасының чемпионаты өтті. Аталған чемпионатқа еліміздің түкпір-түкпірінен кіл мықты, зілтемір көтерудің нағыз шеберлері қатысып, күш сынасты. Осы жарыста Шардара ауданының тумасы Тұрғанбай Әлішер 61 келі салмақта облысымыздың намысын қорғап, бақ сынады.
Жарыс нәтижесінде Ә.Тұрғанбай өзінің жастығына қарамай өз салмағының үздігі екенін дәлелдеп, алтын алқаны иемденді. Ол жұлқа көтеруден 117 кг, серпе көтеруден 140 кг, қоссайыс нәтижесінде 257 кг зілтемірді бағындырып, Түркістан облысынан шыққан ересектер арасындағы тұңғыш Қазақстан Республикасының чемпионы атанды.
Жеңіс жолдар жалғаса берсін!
«Өскен өңір» – ақпарат.
