Қазақ халқы ақындарын ардақтап, өнер иелерін аса құрметтеген халық. Қай жерде болмасын оларға төрінен жай беріп отырған. Жалпы, руханиятымыздың дамуына елеулі үлес қосатын сондай жандарға құрмет көрсету, әсіресе, оларды өскелең ұрпаққа таныстыра жүру біздің міндетіміз десек жаңылмаспыз.
Қазіргі таңда аудан мектептерінде осы өңірден шыққан ақын-жазушылармен кездесу өткізу дәстүрге айналғандай. Күні кеше Қоссейіт ауылындағы «Қоссейіт» жалпы білім беретін мектепте осы ауылдың түлегі, аудандық «Өскен өңір» газетінің директор-бас редакторы, ақын Сәбит Лахановпен оқушылар арасында кездесу кеші өтті. «Өміріме өрнек салдым өлеңмен» деп аталған кездесу кешін мектептің музыка пәнінің мұғалімі Зухра Ұзақова апайымыз ұйымдастырған екен. Кешке мектеп директоры Айнаш Сүлеева, тәрбие ісі жөніндегі меңгеруші Бағила Ракишева бастаған ұстаздар қауымы мен оқушылар қатысты.
Мектеп оқушылары ақын ағаларын мектеп алдында үлкен қошаметпен қарсы алды. Акт залы тақырыпқа орай безендірілген екен.
Кездесу барысында тәрбие ісі жөніндегі меңгеруші Бағила Ракишева кездесуді ұйымдастырудағы мақсаттарын айтып, ізгі тілегін білдірді. Өнерсүйер, жырсүйер оқушылар ақын жырларын жатқа оқып, өздерін толғандырып жүрген сауалдарға тұщымды жауап алды. Енді бір өнерлі өрендер әуелете ән салып, дөңгелене би билеп, кештің шырайын кіргізді.
Сәбит Қоспанұлы кеш барысында шабыттана жыр оқып, балалық шақтағы қызықты оқиғаларын еске алып, әсерлі әңгіме шертті. Кешті ұйымдастырушыларға алғыс білдірді. Осылайша туған ауылына келген ақын ақтарыла сыр айтып, арқа-жарқа жыр оқып, шалқыған көңілмен қайтты.
Оқушылар мен көрермендер аталған кештен әдемі әсер алғандарын айтып, разылық білідірісіп жатты.
Мадина ЕРАЛЫ.
