20-21 сәуір күндері Түркия мемлекетінің Анталья қаласында өткен Халықаралық «Robotex Turkiye 2024» робототехника сайысында ауданымыздағы Мәулен Қалмырза атындағы №3 мамандандырылған мектеп-интернатының информатика пәні мұғалімі Маржан Саудабаеваның жетекшілігімен “Shardara team” робототехника командасы Азияның түкпір-түкпірінен келген 34 команданың арасында өткен білім бәйгесінде “Lego Sumo” категориясы бойынша ІІІ орынды қанжығасына байлап, Италия өтетін жарысқа жолдама алды.

Кеше аудан әкімі Арман Қарсыбаев  “Shardara team” робототехника командасын қабылдап, бағалы сыйлықтар тапсырып, алғыс білдірді.

«Сіздерді Түркия мемлекетінде өткен робототехника сайысында жүлделі орынды иеленіп, Шардараның атын асқақтатып қайтқан жеңістеріңізбен құттықтаймын.

Мемлекетімізде мектеп оқушыларының бүгінгі заман талабына сай білім алулары үшін қажетті мүмкіндіктің барлығы да тиісті деңгейде жасалып отыр. Өздеріңдей жастарымыздың робототехниканы терең игеруі – ел болашағы үшін маңызы өте зор деп білемін. Алдағы Италия мемлекетінде өтетін жарыста да жеңімпаз атанып, еліміздің мерейін одан әрі асырып қайтуларыңызға тілектеспін. Сіздердің жеңістерің біз үшін зор мақтаныш!»- деді аудан әкімі.

Қабылдауда оқушылар өздері жасаған роботтарын таныстырып, идеяларымен бөлісті.

  Аудан әкімінің баспасөз қызметі.