Румыния елiнiң Констанца қаласында армрестлинг спорты бойынша өткен әлем чемпионатында шардаралық спортшылар тамаша ойын өрнегiн көрсетiп, ел қоржынына 14 алтын медаль салды. Тағы да 14 спортшымыз жүлдегер атанды. Абыройымызды асқақтатқан құрыш бiлектi спортшыларымызды елге оралған соң жерлестерi зор құрметпен күтiп алды.
Сәрсенбiнiң сәттi күнi «Шардара Армспорт» спорт клубында чемпиондарды марапаттау рәсiмi өттi. Салтанатты шарада аудан әкiмiнiң мiндетiн атқарушы Бауыржан Шомпиев құттықтау сөз сөйледi.
– Қадiрлi спортшылар! Құрметтi жеңiмпаздар! Биылғы жыл елiмiз үшiн айтулы оқиғаларға толы жыл болып отыр. Елбасымыз 2019 жылды «Жастар жылы» – деп жарияласа, бiздiң өңiрiмiзде Шардара ауданының құрылғанына 55 жыл толады. Жерлестерiмiздiң Европа елiнде үздiк нәтиже көрсетiп, 14 алтын медальды иеленуi – осынау даталарға лайықты тарту болды десек жарасады. Шардараның қол күресiн бүгiнде әлем мойындап отыр. Тәуелсiздiк алғаннан кейiн ғана басталған спорттың бұл түрiнен бүгiнге дейiн 34 әлем чемпионы шығып отырған болса, ендi оған тағы да 14 әлем чемпионы қосылды. Басқа да қаншама спортшыларымыз жүлдемен оралды. Бұл армрестлинг спортының ауданымызда негiзiн қалаушы Арман Қарсыбаев пен оның ұжымының жанкештi еңбектерiнiң нәтижесi деп бiлемiз. Жеңiстерiң құтты болсын! - деген Бауыржан Қуанышбайұлы жеңiмпаз спортшыларға аудан әкiмi Қайрат Жолдыбайдың атынан Алғыс хаттар мен бағалы сыйлықтарды тарту еттi.
Сонымен, Румынияда атой салған жеңiмпаздарымыздың есiмдерiн атап өтсек. Қыздар арасында өткен сайыстарда Назира Зиядулла, Жұлдыз Нарзан, Арай Мәлiк, Ләззат Мәлiкайдар, Мақпал Зиядулла және Ұлбала Камал атты жерлестерiмiз чемпиондық атаққа қол жеткiзсе, ұлдар арасында Нұрболат Басымбек, Асылжан Бекжiгiт, Нұрхат Қалдарбек, Азамат Арапбай, Ердәулет Сарыбай, Мағжан Шәмиев, Талғат Ақтай және Дәурен Әбсаттар есiмдi спортшыларымызға қарсылас шақ келмей, жеңiс тұғырына көтерiлдi. Ал Қуандық Ахмет, Құралай Абдулла, Ердәулет Нұрмахан, Данияр Роман, Ердәулет Мұхамедов, Мәдина Жақып, Бақдәулет Нұргелдi, Есболат Қаржау, Абзал Пiрiмбет, Ернұр Жәдiгерова, Әдiлет Олжабек, Нұрдәулет Қадiр, Нұрдәулет Айдархан атты палуандарымыз әлем бiрiншiлiгiнiң жүлдегерлерi атанды. Спортшылармен қатар осынау әлем бiрiншiлiгiнде 4 бiрдей шәкiртi әлем чемпионы атанған жас жаттықтырушы Жазира Ақбаева мен командаға жетекшiлiк жасаған Бақдәулет Тұрмановтарға да сый-сияпаттар тапсырылды.
Айта кетейiк, былтырғы жылы Түркия елiнде өткен әлем бiрiншiлiгiнде шардаралық қол күрес шеберлерi 14 алтын медальды олжалап, жалпы командалық есепте көш бастаған болатын.
Аудан әкiмiнiң баспасөз қызметi.
