Аудандық мәслихаттың хатшысы Бұлтбай Мүтәлиев бастаған бiр топ депутаттар мен аудан әкiмiнiң орынбасары Бауыржан Шомпиев «Шардара су электр стансасы» АҚ-ында болып,
ондағы жаңғырту жұмыстарының барысымен танысып шықты. Кәсiпорын басшысы Бахытбек Жаңабаев Үдемелi индустриялды-инновациялық даму бағдарламасы және республикалық индустрияландыру картасы аясында атқарылып жатқан жұмыстарды көрсетiп шықты. Өңiрiмiздегi бiрден бiр электр қуатын өндiретiн су электр стансасы пайдалануға берiлген 1967 жылдан берi үздiксiз жұмыс iстеп келедi. Сағатына 100 Мвт электр қуатын өндiретiн кәсiпорында қазiргi таңда жаңғырту жұмыстары аяқталу үстiнде. Бүгiнге дейiн 2 агрегат жаңғыртылған болса, таяу күндерде 3-шi агрегат iске қосылмақ. Келесi жылдың ақпан айында 4-шi агрегат пайдалануға берiледi деп жоспралануда. Шетелдiк компаниялардың озық технологиясы негiзiнде жүзеге асырылып жатқан жаңғырту жұмыстары толық аяқталып шыққан кезде кәсiпорын қуаттылығы 126 Мвт-қа артпақ.
Су электр стансасындағы қарқынды жұмыстармен танысып шыққан қонақтар мұндағы тiрлiктерге жоғары баға бердi. Аудандық ардагерлер Кеңесiнiң төрағасы Тоқсанбай Бердiбеков акционерлiк қоғам ұжымын аудандағы ардагерлер қауымымен бiрлесе жұмыс iстеуге шақырса, аудандық мәслихаттың хатшысы Бұлтбай Мүтәлиев әрбiр шардаралық су электр стансасының қуаттылығын жатқа бiлулерi үшiн жастардың санасына күнделiктi сiңдiрiп отыру қажеттiлiгiне тоқталды. Аудандық мәслихат депутаттары Роза Жүнiсқұлова, Полатбек Күмет, Қозыбақ Жанысбай, Исатай Әдiлхан, Ержан Қарабаев мектеп оқушыларын Шардара су электр стансасына саяхатқа шығарып отыруды ұсыныс ретiнде жеткiздi. Аудан әкiмiнiң орынбасары Бауыржан Қуанышбайұлы қыруар дүние атқарылып жатқанын iс жүзiнде көргеннiң жөнi бөлек екенiн атап өтiп, энергетиктердiң жұмысына сәттiлiк тiледi.
Кездесу соңында «Шардара су электр стансасы» АҚ-ының директоры Бахытбек Жаңабаев келушiлерге алғыс айта отырып, кәсiпорынның 50 жылдық мерейтойына арнап шығарылған кiтапты сыйға тартты.
Аудан әкiмiнiң баспасөз қызметi.
