Өткен аптаның бейсенбiсi күнi аудандық мәдениет сарайында «Ұстаз – ұлы тұлға» атты мерекелiк шара болып өттi. Көпшiлiк ойынан шыққан көңiлдi басқосу мұғалiмдер мен халықаралық қарттар күнiне арналды. Мерекелiк шараны аудандық бiлiм бөлiмi ұйымдастырды.
Аудан әкiмi Қайрат Жолдыбай мерекелiк жиынға қатысушыларды мұғалiмдердiң кәсiби мерекесiмен құттықтап, бiлiм беру мен жас ұрпақты тәрбиелеу iсiнде толағай табыстарға жетiп жүрген бiрқатар ұстаздарды Алғыс хатпен марапаттап, бағалы сыйлық табыстады. Олардың арасында М.Әуезов атындағы жалпы орта мектебiнен Саттарова Зағира, С.Кәттебеков атындағы жалпы орта мектебiнен Рахимова Базаргүл, Ақалтын жалпы орта мектебiнен Омарбеков Талғат, А.Иманов атындағы жалпы орта мектебiнен Бекбергенов Аян, Қ.Сағырбайұлы атындағы жалпы орта мектебiнен Нұрманова Мияш, тағы басқалар бар.
Аудандық бiлiм бөлiмiнiң басшысы Ақшагүл Бердалиева әрiптестерiне ыстық ықыласын жеткiзiп, М.Әуезов атындағы жалпы орта мектептiң мұғалiмi Ж.Ақарбековты, А.Иманов атындағы жалпы орта мектептiң мұғалiмi Айнұр Ынтықбаеваны, Ж.Жабаев атындағы бастауыш мектептiң мұғалiмi Жанат Мырзалиеваны, Т.Тәжiбаев атындағы жалпы орта мектептiң мұғалiмi Сейтахметова Балқияны, тағы басқаларды Алғыс хатпен марапаттады.
Аудандық ардагерлер кеңесiнiң төрағасы Тоқсанбай Бердiбеков ардагер ұстаздарды төл мерекесiмен құттықтап, Сыздықов Жорабектi, Жаңыл Зияшқызын, Есенкүл Нұртайқызын, Жамал Өтегенқызын, Зоя Мамаеваны, Зоя Кәрiбайқызын, Махмұд Момыновты, Ибрайым Нұрғалиды Ардагерлер кеңесi атынан Алғыс хатпен марапаттады.
Мерекелiк iс-шарада аудан мектептерiнiң өнерпаз мұғалiмдерi мен оқушылары өнер көрсеттi. Атап айтқанда, Қ.Аманжолов атындағы жалпы орта мектебiнiң хор ұжымы «Ұстазым» әнiн тамаша орындап шықса, №12 жалпы орта мектеп мұғалiмдерi Садыханов Мереке мен Құралай Алдоңғароваға тыңдаушылар дән риза болды. Достық жалпы орта мектебiнiң мұғалiмi Нұрғали Сансызбаев өз термесiн төгiлттi. Кеш соңында аудан әкiмдiгi атынан ардагер ұстаздарға сый-сияпат жасалды. Мереке құтты болсын, ұстаздар мен ардагерлер!
Өз тiлшiмiзден.
