«AMANAT» партиясы Түркістан облыстық филиалының кезекті «Құқықтық көмек» жобасы аясындағы мобильді көшпелі қоғамдық қабылдауы облыс орталығынан шалғай жатқан Шардара ауданында өтті.
Қ.Тұрысбеков ауылдық округіне қарасты Шардара елдімекеніндегі кездесуге 150-ге жуық тұрғын келген. Қабылдауға аудан әкімі Арман Қарсыбаев, облыстық мәслихаттың депутаты Бақытжан Серманизов және «AMANAT» партиясы Түркістан облыстық фили алы Атқарушы хатшысының орынбасары Полат Тұрсынбаев қатысты.
Полат Мұратұлы көшпелі қоғамдық қабылдаудың мақсат-міндетін түсіндіріп өтіп, мемлекеттік орган өкілдерінің басын қосып, әр аудандағы шалғай елді мекендерде қоғамдық қабылдаулар өткізуді үрдіске айналдырған халықтық саяси ұйымға үміт артушылар да көп екенін жеткізді. Аудандық филиалдың төрағасы Ережеп Бекет «AMANAT» партиясының осылайша халық пен билік арасындағы алтын көпірге айналғанын айтып, жиналған тұрғындарға облыс орталығына сабылмай осында барлық мәселені шешіп алуларына мүмкіндік туып отырғанын айтты.
Прокуратура, жеке сот орындаушылары мен заңгерлер, адвокаттар, басқарма өкілдері мен депутаттарға жүгінген ауыл азаматтарының сауалдары сан салалы болды. Ақалтын ауылынан келген Мейрамбек Тұрғанбаев ауылдағы көлді қашыртқыға қосу керектігін ұсынды. Аталған сұраққа тиісті басқарма өкілі ол бойынша жобалық сметалық құжаттаманың әзірленгенін, құрылыс жұмыстарының енді басталатынын айтып жауап берді.
Түркістан облысы жұмыспен қамтуды үйлестіру және әлеуметтік бағдарламалар басқармасының өкіліне ақылы қоғамдық жұмыс жалақысының уақытылы берілмеуі, қайтарымсыз грант, «Ауыл аманаты» жобасымен 2,5 пайыздық несие алу жайы және мүмкіндігі шектеулі азаматтарға арналған орталық ашу бойынша сұрақтар мен өтініш-ұсыныстар айтылып, басқарма өкілі тарапынан әрбір сұраққа жан-жақты толық жауап қайтарылды.
Сонымен бірге, «Оңтүстік Жарық Транзит» жауапкершілігі шектеулі серіктестігіне ауылдағы электр бағаналарының ескіргенін, кейбіреуінің тіпті мүлдем жарамсыз болып қалғанын айтып шағымданған ауыл тұрғындарына, әрбір бағананың жай-күйін, жоспар бойынша қашан ауыстырылатыны түсіндірілді. Одан бөлек қабылдауға келген ауыл тұрғындары ауыз су, балалар алаңшасы, тұрғын үй мәселесі жастарға берілетін несиеге қатысты түйткілді жәйттерге түрлі мекеме өкілдерінен облыс орталығына сабылмай-ақ бір жерден жауап алынды.
«AMANAT» партиясы Түркістан облыстық филиалының баспасөз қызметі.
