Апта барысында аудандық ардагерлер кеңесінде кезекті пленум болып өтті. Жиынға аудан әкімінің орынбасарлары Б.Төребеков, Е.Қаратүнов, аудандық ішкі саясат бөлімі басшысы Е.Нұрахов, аудандағы мекеме басшылары, ардагерлер кеңесі жанындағы пленум мүшелері және бастауыш ардагерлер ұйымдары төрағалары қатысты.
Пленумды ардагерлер кеңесінің төрағасы Т.Бердібеков жүргізіп отырды. Төраға жиынның күн тәртібінде 3 мәселе – мемлекет басшысы Қ.К.Тоқаевтың «Ана тілі» газетіне берген сұхбаты жайлы пікір алмасу, ардагерлер кеңесінің 2024 жылы атқарған жұмыстары жайлы есепті хабарлама, өзге де мәселелер төңірегінде талқылау болатындығын айтып өтті.
Күн тәртібіндегі бірінші мәселе бойынша Т.Бердібековтің өзі хабарлама жасады. Хабарламашы өз сөзінде Президентіміздің сұхбатында әлемдік геосаяси жағдай, еліміздегі экономикалық ахуал, алда атқарылатын жұмыстар жайлы егжей-тегжейлі айтылғанын атап өтті. Сонымен қатар ардагерлер қауымын ел бірлігі үшін еңбек ете беруге шақырды.
Мұнан соң екінші мәселе бойынша ардагерлер кеңесі төрағасының орынбасары Б.Рахматуллаев өткен жылға байланысты есепті баяндама жасап, атқарылған жұмыстарды айтып өтті. Мұнан соң аудан әкімінің орынбасарлары Б.Төребеков пен Е.Қаратүновтер де ардагерлердің атқарып отырған жұмыстарына қатысты жағымды пікірлерін айтып, оларды қолдау бағытында бірнеше ұсыныстарын білдірді.
Жарыссөз барысында Президент Қ.Тоқаевтың «Ана тілі» газетіне берген сұхбаты талқыланып, Ж.Аманов, М.Мархабаев, Ж.Ізбайқызы, Ж.Айдарова сынды еңбек ардагерлері өзіндік ойларымен бөлісіп, мақалада көтерілген мәселелерді қолдайтындықтарын жеткізді. Пленумда қаралған басқа да түрлі мәселелер талқылана отырып, тиісті қаулы қабылданды.
Биылғы жылы өткізілген алғашқы пленумды қорытындылаған ардагерлер кеңесінің төрағасы Т.Бердібеков ағымдағы жылы ардагерлермен жұмысты ширата түсу, ауданның 60 жылдық мерейтойын өз деңгейінде өткізу жұмыстарына қатысты тиянақты ойларын жеткізді.
Өз тілшімізден.
