Шардара ауданының спорт саласындағы жетiстiктерiн көзi қарақты оқырмандар жақсы бiледi.
Спортшыларымыздың жеңiстен-жеңiске жетулерiне спорттық ғимараттарда өткiзген жаттығуының себi тиiп жүргендiгi айтпаса да белгiлi. Соңғы жылдары аудан көлемiнде бiрнеше спорттық нысандар бой көтерiп, бұқаралық спорттың дамуына айырықша септiгiн тигiзуде. Аптаның үшiншi күнiнде Шардара қаласындағы Өтеғұл елдi мекенiнде тағы бiр спорт алаңшасы iске қосылды.
Осы күнi аудан әкiмiнiң орынбасары Б.Шомпиев аталған елдi мекенде болып, аудан әкiмдiгi қаражаты есебiнен жергiлiктi тұрғындар үшiн салынған спорт алаңшасының (футбол, баскетбол, үстел тенисi) лентасын қиды. Алаңшаның салтанатты ашылу рәсiмiнде сөз алған Б.Қуанышбайұлы Қазақстан Республикасы Тәуелсiздiгiнiң 30 жылдығы аясында жаңадан ашылып отырған спорт алаңшасы жастарымыздың дене тәрбиесiмен, спортпен айналысуына, олардың шеберлiгiн арттыруға және одан әрi шыңдалуына жағдай жасайтынын жеткiздi.
Өз тiлшiмiзден.
