Ауданымызда Қазақстан Республикасы Тәуелсіздігінің 30 жылдығына орай, көптеген іс-шаралар ұйымдастырылды. Сондай шаралардың біріне аудандық ішкі саясат бөлімі ұйытқы болды.
Нақтылай айтсақ, аталған бөлім «Жастар Тәуелсіздікті жырлайды» атты жас ақындар арасында аудандық мүшәйра ұйымдастырды.
Шараның ашылу салтанатында сөз алған аудан әкімінің орынбасары Б.Шомпиев Тәуелсіздіктің мәні мен мағынасы жайлы кеңінен әңгімелеп берді. Талапты жастар мен өлеңсүйер қауымды айтулы мерекемен құттықтап, жас ақындарға сәттілік тіледі.
Жыр додасына аудандық ішкі саясат бөлімінің басшысы Бақытжан Таласов. ақын, аудандық "Өскен өңір" газетінің бас редакторы Сәбит Лаханов, аудандық жұмыспен қамту және әлеуметтік бағдарламалар бөлімі басшысының орынбасары Орынша Қалшабековалар әділқазылық жасады.
Мүшәйраның іріктеу кезеңінен іркілмей өткен 15 жас ақын аталған шешуші кезеңде бірінен-бірі асып тамаша өнер көрсетті. Жас ақындардың елге, Отанға, туған жерге деген ыстық сезімдері әр өлең жолдарынан көрініп тұрды. Болашағынан зор үміт күттіретін жастардың талабына тыңдармандар ықыластана қол соғып, қошамет білдіріп отырды.
Сайыс қорытындысы бойынша, Ы.Алтынсарин атындағы негізгі мектептің мұғалімі Бекжұма Нарбай Бас жүлдені жеңіп алды. «Өскен өңір» газетінің қызметкері Ақбота Өсербай жүлделі 1-орынды иеленді. №3 М.Қалмырза атындағы мамандандырылған мектеп-интернатының оқушысы Аяулым Асылбекова мен Ш.Уәлиханов атындағы жалпы орта мектеп оқушысы Саят Мырзамедин ІІ орынға лайық деп танылды. М.Әуезов атындағы ЖОМ оқушылары Мерейгүл Ерғали мен Айжан Маханбет, Шардара мектеп-лицейінің оқушысы Ақерке Морбектер ІІІ орынды иемденді. №3 М.Қалмырза атындағы мамандандырылған мектеп-интернатының оқушысы Ақбаян Жүніс, «Сырдария» ЖОМ оқушылары – Аяулым Жолжан, Мерей Әліқұл, Жарқын Әбибулла, Ш.Уәлиханов атындағы жалпы орта мектеп оқушысы Мәдина Нышанбай, Шардара мектеп-лицейінің оқушылары Аружан Әмірхан, Айзере Жүрсіндер тиісінше «Құдайберген Өтеш атындағы», «Әмірхан Балқыбек атындағы», «Оңалбай Еспан атындағы», «Жұмабек Мұқан атындағы», «Камал Ендібаев атындағы», «Қаныбек Сарыбаев атындағы» және «Аудандық ішкі саясат бөлімінің арнайы жүлдесін» иеленді.
Жеңімпаздарға Алғыс хаттар мен бағалы сыйлықтар тапсырылды.
Өз тілшімізден.
