Қазақстан Республикасы Парламент Мәжілісінің депутаты Ертаев Сырым Махамбетұлы ауданымызға арнайы іс-сапармен келді.
С.Махамбетұлы аудандық халықты жұмыспен қамту және әлеуметтік бағдарламалар бөлімінде ауданның әлеуметтік сала қызметкерлерімен, «Армспорт» спорт кешенінде аудандық «Jas Otan» жастар қанаты мүшелерімен және спортшылармен, аудандық оқушылар үйінде ауданның білім және ғылым саласының өкілдерімен кездесулер өткізіп, алдағы жексенбіде өтетін Конституцияға ендірілетін өзгерістер мен толықтырулар жөнінде ақпарат берді. Депутаттың халықпен кездесуіне аудан әкімі Қайрат Жолдыбай, аудандық мәслихат хатшысы Арман Қарсыбаев, «Amanat» партиясы Шардара аудандық филиалының атқарушы хатшысы Ерғали Қарымсақов Нұрболат Ділдәбек қатысты.
Жиындар барысында Мәжіліс депутаты араға 27 жыл салып өткізіліп отырған жалпыхалықтық референдумның ерекшеліктеріне тоқталып, бұл референдумды әкім немесе депутат сайлауы деп қате түсінбеу керектігін атап өтті.
– Енді президент ешқандай партияның мүшесі болмайды. Президенттің туған-туыстары мемлекеттік басшылықта қызмет атқармайды. Қай деңгейдегі депутат болам десе де партияда болу міндет емес. Депутаттар енді халық арасында жиі болады. Себебі сайлаушылардың сенімін ақтай алмаған депутатты кері шақырып алып, орнына басқаны сайлауға болады. «Жолға үш адам болып шықсаң біріңді басшы етіп ал» деген. Біздің басшымыз, Президентіміз Қасым-Жомарт Кемелұлы Тоқаев. Президентіміз айтса, біз қосшы болып қасынан табылуымыз керек. Референдум жалпы халыққа тиімді болғандықтан, бәріміз қатысуымыз керек, – деді Сырым Махамбетұлы.
Кездесуді қорытындылаған аудан әкімі Қайрат Жолдыбайұлы Конституцияға ендірілетін өзгерістер мен толықтыруларды халық арасында насихаттау бойынша арнайы топтар құрылып, жұмыс жасағанын айта келіп, шардаралықтар референдумға түгел қатысады деген сенімін білдірді.
С.Махамбетұлының сапары барысында атақты спортшы, аудандық мәслихаттың хатшысы Арман Қарсыбаев негізін қалаған «Армспорт» спорт кешенін аралап көріп, жаттығу залдарымен танысып, атақты спортшы Қыдырғали Оңғарбаевпен сұхбаттасты. Қазақстан Республикасының чемпионы Хадиша Исламбектің спорт өнерімен танысып, Әлем чемпионы аталуына тілектестігін білдірді. Аудандық оқушылар үйіндегі «Ботаникалық бақты» көріп, өзінің ризашылығын білдірді.
Парламент Мәжілісінің депутаты Қ.Тұрысбеков, Қоссейіт ауыл округтері тұрғындарымен де кездесу өткізіп, бірқатар азаматтардың сұрақтарына жауап қайтарды.
Аудан әкімінің баспасөз қызметі.
