Бүгінгі күндері Шардара аудандық тарихи-өлкетану музейінің ұжымы көрме экспозициясына тұрақты түрде экскурсиялар жүргізіп, «Ардақты ардагер» атауымен лекциялар оқуда. Апта барысында мекемедегі кезекті қойылған көрме «Қазына дарыған құрметтілер» атауымен көпшілікке ұсынылды.
Шардара ауданының Құрметті азаматы, «Құрмет» орденінің иегері Қыстау Інайұлы Ілесовтың мағыналы өмірінен мол мағлұмат беретін көрмеде еңбек ардагерінің мемлекеттік наградалары мен көптеген түрлі-түсті фотосуреттері жайғасқан. Музейге арнайы соққан аудан ардагерлері көрме кейіпкерімен тағы бір рет жете танысып, ардақты жанның өмір белестеріне тереңірек үңілді. Аудандық Ардагерлер Кеңесі төрағасы Тоқсанбай Бердібеков Қ.Ілесовтың қызметтік жетістіктеріне шолу жасай отырып, еңбек ардагерінің бүгінгі таңдағы қоғамдық негіздегі қарқынды қызметін атап өтті. Сонымен қатар, С.Қуан, Ж.Жаңабаев, М.Нұрпейісов, Ж.Таңбаев және Д.Лес сынды шардаралық еңбек ардагерлері көрме жөнінде келелі әңгіме қозғап, замандастарының жарқын жетістіктерін мысал етті.
Өз тілшімізден.
