1994 жылдан бері әлемнің 100-ге жуық мемлекеті атап өтетін «Ұстаздар күні» мерекесі шағалалы Шардара ауданында да жоғары деңгейде өткізілді.
Мұғалімге көрсетілетін құрмет пен ізет ешқашан толастаған емес. Апта басында «Ұстаздар күні» мерекесіне орай аудандық мәдениет үйінде «Ұстаз – ұлы тұлға» тақырыбы аясында өткен мерекелік шарада бірқатар ұстаздарға құрмет көрсетілді.
Аталған шараға аудан әкімінің орынбасары Б.Шомпиев арнайы қатысып: «Болашақтың басшысын да, данасын да, ғалымын да ұстаз өсіреді. Өмірге ұрпақ берген аналарды қалай ардақтасақ, сол ұрпақты тәрбиелейтін ұстаздарды да солай ардақтауға міндеттіміз. Жас ұрпақтың бойына Отанға деген сүйіспеншілігін арттырып, өмірдің қыр-сырын танытып жүрген ұстаздар, мерекелеріңіз құтты болсын! Сіздерді барша аудан халқының атынан құттықтаймын!», – деп еңбегімен еленіп, білім беру ісінде толағай табыстарға жетіп жүрген ауданның бірқатар ұстаздарын аудан әкімінің Алғыс хатымен марапаттап, сый-сияпаттар тапсырды.
Аудан әкімі орынбасарының құттықтауынан соң, ұстаздар қауымының аудандық кәсіподақ ұйымының төрағасы Ұлықбек Жұманов құттықтау сөз сөйлеп, бірқатар ұстаздарға кәсіподақ атынан төсбелгілер табыстады. Сондай-ақ, аудандық адами әлеуетті дамыту бөлімі басшысының міндетін атқарушы Ақжібек Жантөреева да өз атынын ұстаздарға Алғыс хаттар табыстады.
Мерекелік шараның әдемі өрбуіне ардагер ұстаз, ақын Нұрғали Ыбрайым ағамыздың әдемі сөзімен жылы лебізін жеткізіп, өз шығармашылығынан өрілген өлең оқығаны да сеп болды.
Ұстаздардың төл мерекесі Қарттар күні мерекесімен тұспа-тұс келгендіктен, алтын қазыналарымыз – ардагер ұстаздардың жүріп өткен жолдарын көпшілікке насихаттау үлкен міндет. Аталған шарада білім мен тәрбие саласына саналы ғұмырын арнап, бүгінде зейнеткерлік жаста болса да ұрпақ тәрбиесі мен ұрпақтар сабақтастығын сақтауда елеулі еңбек етіп жүрген ардагер ұстаздар арнайы қонақ болып ұлықталып, марапатқа ие болды. Оларға құрмет көрсетіліп, гүл шоқтары ұсынылды.
Мерекелік шара барысында жарыссөзге шыққан ұстаздар елдегі білім мен ғылым саласына жасалып жатқан қамқорлықтар, оқу нысандарындағы материалдық-техникалық базаны нығайтуға қаралып жатқан қаражаттардың күн санап артып келе жатқандығын мақтанышпен айтып, педагогтар мен білім алушыларға әлемдік бәсекеге қабілетті болу үшін тынымсыз ізденіс керектігін тілге тиек етті.
Мерекелік шара соңында ауданымыздың өнерлі ұстаздары мен оқушылары әуезді ән орындап, көрермендер қосыла шырқап, мерекелік көңіл-күйде тарқасты.
Бота Болатова.
