Газетіміздің алдыңғы нөмірінде хабарлағанымыздай 11 қазан күні аудандық мәдениет сарайында ақиық ақын, қоғам қайраткері, жерлесіміз Қазыбек Исаның 60 жылдығына орай «Қазақтың Қазыбегі» атты шығармашылық кеш өтті.
Ауылын аңсап келген ақынды қаланың кіреберісіндегі «Төрт қақпа» маңынан аудан әкімі Қайрат Жолдыбай бастаған шардаралықтар зор қошеметпен қарсы алды. Мұнан кейінгі шара аудандық мәдениет сарайында жалғасын тапты.
Ақын мен әкім бастаған топ әуелі ұлы Абайдың ескерткішіне гүл шоқтарын қойып, қонақтар Қ.Исаның шығармашылығына арналған көрмені тамашалады.
Ақынның шығармашылық кешіне аудан әкімінен бастап, бір топ ел ағалары, сонымен бірге жерлесіміз, қоғам қайраткері Ислам Әбішов, облыстың «Құрметті азаматы», ғалым, әдебиетші, академик Құлбек Еркөбек, ҚР Парламентінің депутаты Серік Ерубаев, «Ақ жол» партиясы қаржылық-ревизиялық комиссия төрағасы Болат Өтепбаев, Моңғолия елінің еңбек сіңірген қайраткері, ақын Сұраған Рахмет, ақын, «Көк тудың желбірегені» әнінің сөзін жазған Алмас Ахметбекұлы, ақын, тележурналист Нұрлан Әбдік, «Ақ жол» партиясы Шымкент қаласы филиалының төрағасы Әлімхан Әбжанов, кәсіпкер Абзалбек Сағымбекұлы және ақын, «Егемен Қазақстан» газетінің тілшісі Батырхан Сәрсенхан және ауданның зиялы қауым өкілдері мен өзге де қонақтар қатысты.
Шығармашылық кештің ашылу салтанатында сөз алған аудан әкімі Қайрат Жолдыбай ақынға ізгі тілектерін жолдап, аудан халқы атынан ақынға құрмет көрсетіп, ақбоз ат мінгізді.
Сонымен қатар, кешке келген ел ағалары мен ақындар құттықтау сөз сөйлеп, естеліктерін еске түсіріп, арнау өлеңдерін оқыды.
Естеріңізде болса, аудан әкімінің тікелей ықпал етуімен шардаралық шайырлардың жыр топтамасы құрастырылып жатқанын осы басылым бетінде сүйіншілей жазған болатынбыз. Осы шығармашылық кеш басталар тұста аталған жыр кітабының сүйінші данасы келіп жетті. Кеш барысында мерекелік тарту ретінде «Шежірелі өлке шайырлары» атты шардаралық ақындар антологиясының тұсаукесер рәсімі өтіп, көпшілікке таныстырылды.
Мерекелік жиында Қазыбек есімді бозбалалар ақын шығармашылығынан жатқа өлеңдер оқып, туған күніне жырдан тарту жасады. Қ.Иса бала шайырларға риза болып, өз кітабын сыйлыққа беріп, бірге өлең оқысты.
Батыр Ана, ақын Жарылқасын Ізбайқызы жетекшілік ететін «Ақ әжелер» халықтық ансамблі бастап аудан өнерпаздары Қазбек Исаның сөзіне жазылған әндерден шашу шашып, мәдениет сарайын әсем әуенмен көмкерді.
Ақын да өз кезегінде төбесіне көтеріп құрметтеген жерлестеріне ақ алғысын жаудырды.
Қ.Жарылқасынұлы салтанатты кештен кейін, аудандық оқушылар үйінде болып, «Қазыбек Иса атындағы шығармашылық бірлестік» мүшелерімен, өнер адамдарымен кездесті. Кездесуде ауданның ақын-жазушыларымен пікір алмасып, ұсыныстар айтылып, шығармашылық тұрғыда ой өрбітті.
Шара соңында ақиық ақын, халық қалаулысы Қ.Иса бастаған топ Қазақстанды әлемге танытып отырған «Шардара Армспорт» клубына барып, ондағы жұмыс барысымен танысып, спортшылармен кездесті. Шардараның даңқын шартарапқа танытып жүрген спортшы жастарға ақ батасын беріп, жеңісті күндер тіледі.
Аудан әкімінің баспасөз қызметі.
