Күнделікті өмірде он екі мүшесі сау болса да жігері құм болып, рухы шағылып, алға ұмтылуды мақсат тұтпайтын жасық мінезді азаматтар кездесіп жатады. Ал, өзі жарымжан, мүмкіндігі шектеулі бола тұра, рухы биік, қолынан келгенше өмірден өз орнын табуға қанатына жан бітіріп, талпынып жатқан жандардың қам-қарекеті өмір сүруге деген құлшынысыңды арттыра түседі.
Жастардың әлеуметтік жобасын қолдау мақсатында құрылған «Zhas Project» жобасының 1 млн теңге көлеміндегі грант иегері Өнербай Төлебаевтың ұйымдастыруымен «Қасиет» әлеуметтік көмек көрсету орталығында мүмкіндігі шектеулі жандар арасында спорттық турнир өтті. Турнир шахмат, дойбы, тоғызқұмалақ ойындарын қамтыды. Жарысқа 15-ке жуық адам қатысты.
Шарада алғаш болып сөз алған «Қасиет» әлеуметтік көмек көрсету орталығының директоры Ж.Қабылов: «Өмірдің қиындығына мойымай, жігерін қамшылап, бойындағы күш-қуатын өмір сүруге деген талпынысқа жұмсап отырған мына сіздерге Алла разы болсын. Осындай жарысты жас та болса үлкен көлемде ұйымдастырып әрі демеуші болып отырған Өнербай ініме рахмет. Бүгінгі жарыс додасында сіздерге тек жеңіс тілеймін!» – деді. Аталған турнир-
дің әділ өтуін қадағалап, төрешілік еткен Нұрбол Сейдуәлиев қатысушыларға сайыстың ережесін түсіндіріп, белгілі бір уақыт режимін белгіледі.
Жарыстың қорытындысы бойынша тоғызқұмалақтан бірінші орынды Махаббат Абдрахманова жеңіп алды. Екінші орынға Ерлан Смайлов ие болса, үшінші орынға Рыскүл Досанова лайық деп танылды.
Дойбы ойыны бойынша бірінші орынға Қанат Бегалиев, екінші орынға Бека Сейдахмет, үшінші орынға Қуаныш Бекбенбетов ие болды.
Шахматтан бірінші орынды Изатулла Құрманбай иеленсе, екінші орынды Елқонды Ахметов, үшінші орынды Есенгелді Сариев жеңіп алды.
Өнербай Төлебаев пен Қуаныш Ерназар жеңімпаздарға медаль мен бағалы сыйлықтар табыстап, Сәуле Жүсіп, Айпаршын Бигелова, Гульнара Айымбетова, Алмасбек Бигелов, Базарбай Қайназаровтарға жақсы ойын көрсеткені үшін ынталандыру сыйлықтарын тапсырды.
Жарыс соңында грант иегері Өнербай Төлебаев: «Мен бұл турнирді мүмкіндігі шектеулі жандардың уақытын тиімді пайдалану, салауатты өмір салтын ұстану, олардың ойынға деген қызығушылығын арттыру масқатында өткізіп отырмын. Менің ұйымдастырып жатқан іс-шарама ақ батасын беріп, қолдау білдірген «Қасиет» әлеуметтік көмек көрсету орталығының директоры Ж.Қабыловқа алғысымды айтамын. Осы турнирді өткізу барысында маған көмек беріп, басы-қасында болған Қуаныш Ерназар ағама да үлкен рахмет. Жақсы ойын көрсетіп, сайысты тартысты өткізген сіздерге де рахмет, аға-әпкелер. Мұндай жарыстар бұл орталықта алдағы уақытта да өз жалғасын таба берсін деген тілек білдіремін» – деді.
Бота Өсербай.
