Аудан әкiмi Қайрат Жолдыбай Түркiстан облыстық ауыр атлетика федерациясының президентi болып сайланды.
21 қаңтар күнi қаладағы Спорт кешенiнде Түркiстан облыстық дене шынықтыру және спорт басқармасының басшысы Полат Қырықбаев аудан әкiмi Қайрат Жолдыбайға федерация президентiнiң куәлiгiн салтанатты түрде тапсырды.
Өз кезегiнде сөз алған Қайрат Жолдыбайұлы алдағы уақытта өңiрiмiзде спорттың ауыр атлетика саласын одан әрi дамыту үшiн күш-жiгерiн аямайтынын жеткiздi.
Ауыр атлетикадан жасөспiрiмдер арасында ұйымдастырылған Түркiстан облыстық чемпионатында аудан әкiмi Қайрат Жолдыбайұлы облыстық ауыр атлетикадан жасөспiрiмдер құрамасының жаттықтырушысы Асхат Көбеевке, Полат Наурызбайұлы облыстық ауыр атлетикадан жасөспiрiмдер құрамасының аға жаттықтырушысы Талғат Өскенбаевқа ЗКС олимпиадалық штангаларын сыйға тартты.
Салтанатты шараға қатысқан белгiлi бапкер, ауыр атлетикадан олимпиаданың күмiс жүлдегерi Жазира Жаппарқұлдың алғашқы ұстазы болған Дүйсебек Құрманов сөз сөйлеп, зiлтемiршi жастарға ақ батасын бердi.
Мұнан кейiн 2005 жылы туылған және одан кiшi жасөспiрiм ұлдар мен қыздар арасындағы ауыр атлетикадан облыс чемпионаты басталып кеттi.
«БIЗДIҢ МАҚСАТ – ОЛИМПИАДА»
Елбасының «Болашаққа бағдар: рухани жаңғыру» бағдарламасының «Туған жер» жобасы аясында аймақта алғашқылардың бiрi болып Шардара қаласындағы «Армспорт» клубында демеушiлердiң көмегiмен «Бiздiң мақсат – Олимпиада» атты спорттық ескерткiшi ашылды. Игi тiрлiкке арнайы ат басын бұрып келген Түркiстан облыстық дене шынықтыру және спорт басқармасының басшысы Полат Қырықбаев, аудан әкiмi Қайрат Жолдыбай «Армспорт» спорт клубында бой көтерген биiктiгi 4 метр келетiн «Бiздiң мақсат – Олимпиада» ескерткiшiнiң жамылғысын сыпырып, салтанатты түрде ашып бердi. Сондай-ақ, жастарды өмiр салтына баулу және уақыттарын тиiмдi пайдалану мақсатында салынған воркаут, футбол алаңшасы және жазғы жаттығу алаңдары да ашылып, пайдалануға берiлдi.
– Бүгiнде Шардара спорты қарқынды даму үстiнде. Соңғы жылдар бедерiнде спорттың бiрнеше түрiнен әлем чемпиондары шығып, шардаралық спортшылардың есiмдерi төрткүл дүниеге танылды. Былтырғы жылы облыс әкiмi Өмiрзақ Шөкеев осында ат басын бұрып келiп, мұндағы атқарылып жатқан жұмыстарға ризашылығын бiлдiрiп кеттi. Өмiрзақ Естайұлы жерлестерiмiзге микроавтобус сыйға тартып, өзiнiң атынан тал көшетiн отырғызып бердi. Алдағы уақытта ауданымыздан олимпиада шыңын бағындыратын ұл-қыздар өсiп шыға бередi деп сенемiн, – дедi Қайрат Жолдыбайұлы.
– Шардараға әр келген сайын бiр жаңалыққа куә боламыз. Қажырлы еңбегiмен аудан спортын дамытуға айрықша үлес қосып келе жатқан Арман Қарсыбаевтың еңбегiн мемлекет басшысы Қасым-Жомарт Тоқаев жоғары бағалап, былтыр «Құрмет» орденiмен марапаттады, –деген Түркiстан облыстық дене шынықтыру және спорт басқармасының басшысы Полат Қырықбаев алдағы уақытта Шардара ауданында спорт саласы бойынша республикалық семинар өткiзiлетiнiн жеткiздi.
Жаңа алаңдардың ашылу салтанатынан кейiн қонақтар «Армспорт» спорт клубының тыныс-тiршiлiгiмен танысып, жаттығу залында тер төгiп жүрген өрендерге сәттiлiк тiледi.
К.ҚҰЛЫМБЕТТЕГI
