Қаладағы №1 М.Әуезов атындағы жалпы орта мектепте биылғы жылдың 17 маусымы мен 23 маусымы аралығында Қарағанды облысының «Спасск» оқу-жаттығу орталығында өткізілетін «Айбын–2023» IX Республикалық әскери-патриоттық жастар жиынына аудан мектептерін қатыстыру мақсатында аудандық адами әлеуетті дамыту бөлімі мен аудандық қорғаныс істері жөніндегі бөлімнің ұйымдастыруымен іріктеу сайысы өтті. Оған қаладағы тоғыз мектеп пен №16 колледж қатысты.
Сайысты өткізудегі мақсат – жастар арасында әскери–патриоттық жұмыстарды жетілдіру, Қазақстан Республикасы Қарулы күштерінің мәртебесін көтеру, әскери қызметті насихаттау.
Мектепаралық сайыста АК–74 автоматын бөлшектеу және жинақтау, пневматикалық винтовкадан ату, белтемірге тартылу, арқан тарту, арқаға жатып денені көтеру (қыздар арасында), газ тұтқышты және плащ түріндегі жалпы әскери қорғаныс жиынтығын кию бойынша оқушылар өздерінің білімдерін сарапқа салды. Барлық мектептер жақсы дайындықпен келгенімен, сайыс барысында арасынан суырылып шыққандары да болды.
Іріктеу сайысына Шардара аудандық қорғаныс істері жөніндегі бөлім бастығының орынбасары, майор Байменов Талғат Мұсаұлы, бөлім бастығының көмекшісі Омарова Ақерке Рзақұлқызы, Шардара аудандық адами әлеуетті дамыту бөлімінің әдіскері Әбілқасым Ерман Серікұлы, аудандық «Жастар ресурстық орталығының» әдіскері Қияш Еркебұлан, Шардара аудандық Ауған соғысы ардагерлері мен мүгедектерінің қоғамдық бірлестігінің төрағасы Мырзахан Жұмалиев, осы бірлестік жанындағы аудандық әскери-патриоттың клуб жетекшісі Асқар Шералиев, Тәжік–Ауған соғысы ардагерлерінің төрағасы Дәндібай Қосаевтар қатысып, сайысты саралап, жеңімпаз мектептерді анықтады.
Төрт сағатқа созылған «Айбын–2023» аудандық әскери–патриоттық жастар жиынының аймақтық жарысын- да АК–74 автоматын бөлшектеу және жинақтау бойынша бірінші орынды №16 колледж, екінші орынды М.Горький атындағы жалпы орта мектеп, үшінші орынды Шардара мектеп–лицейі иеленді.
Пневматикалық винтовкадан ату бойынша бірінші орынды Қ.Сағырбайұлы атындағы жалпы орта мектеп, екінші орынды №16 колледж, үшінші орынды Жаушықұм мектеп–лицейі, белтемірге тартылудан М.Әуезов атындағы жалпы орта мектеп бірінші, М.Горький атындағы жалпы орта мектеп екінші, Жаушықұм мектеп–лицейі үшінші орынды иеленді.
Арқаға жатып денені көтеруден М.Горький атындағы жалпы орта мектеп бірінші, Жаушықұм мектеп–лицейі екінші, Б.Соқпақбаев атындағы жалпы орта мектеп үшінші орын жеңімпаздары болса, арқан тартудан бірінші орынды Шардара мектеп-лицейі, екінші орынды №12 жалпы орта мектеп, үшінші орынды Б.Соқпақбаев атындағы жалпы орта мектеп иеленді.
Газ тұтқышты және плащ түріндегі жалпы әскери қорғаныс жиынтығын кию бойынша М.Әуезов атындағы жалпы орта мектеп бірінші, №16 колледж екінші, Б.Соқпақбаев атындағы жалпы орта мектеп үшінші орындардың жеңімпаздары болып танылды.
Командалық есеп бойынша №16 колледж бірінші, М.Горький атындағы жалпы орта мектеп екінші, М.Әуезов атындағы жалпы орта мектеп үшінші орынды иеленді. Жеке жетістіктері бойынша оқушыларды жақсы дайындықпен алып келген Б.Соқпақбаев атындағы жалпы орта мектептің әскери жетекшісі Нұралы Балтаев пен оқушылардан Бірғаным Абдулла мен Нұрсұлтан Айтмұхан "үздік" деп танылды. Жеңімпаздарға аудандық ішкі саясат бөлімінің, аудандық адами әлеуетті дамыту бөлімінің, аудандық қорғаныс істері жөніндегі бөлімі басшыларының Алғыс хаттары табысталды.
Жиынды қорытындылаған аудандық қорғаныс істері жөніндегі бөлім бастығының орынбасары, майор Талғат Мұсаұлы жиынның әділ бағаланғандығын айта келіп, келер жылы сайыс бұдан да ауқымды өткізілетіндігін, онда киім мен тәртіпке де көңіл бөлінетіндігі жөнінде айтты.
Өз тілшімізден.
