Осыдан он жыл бұрын облыстық ардагерлер Кеңесі жанынан «Әжелер алқасы» ұйымы құрылған еді. Мұнан кейін барлық аудандарда да ардагерлер Кеңесі жанынан «Әжелер алқасы» өмірге келіп, тәлім-тәрбиелік жұмыстар одан әрі жанданып сала берген.
Кешегі апта соңында Шардара аудандық ардагерлер Кеңесінің ұйымдастыруымен аудандық мәдениет сарайында «Әжелер – ел ұйытқысы» тақырыбында облыстық форум өтті. Жиынға аудан әкімі Қайрат Жолдыбай, облыстық ардагерлер кеңесі жанындағы «Әжелер алқасының» төрайымы Фатима Тілеубердиева, облыстық ардагерлер кеңесінің хатшысы Балзия Тәжібаева, аудандық ардагерлер кеңесінің төрағасы Тоқсанбай Бердібеков, «Аманат» партиясының аудандық филиалының төрағасы Ережеп Бекет, аудандағы бастауыш ардагерлер ұйымының төрағалары мен солардың жанынан құрылған «Әжелер алқасының» төрайымдары, еңбек ардагерлері мен ұстаздар қауымы қатысты.
Аудан әкімі Қайрат Жолдыбай форумға жиналғандарды «Әжелер алқасы» ұйымының 10 жылдық мерекесімен құттықтады. Мұнан соң аудандық ардагерлер кеңесінің төрағасы Тоқсанбай Бердібеков аудандағы «Әжелер алқасы» атына заты сай жұмыстар атқарғанын, алғашқы төрайымы болған Жамал Төлешованың ерен еңбегін айрықша атап өтті. Десе дегендей, ардагер ұстаз, «Құрмет» орденінің иегері, ауданның Құрметті азаматы Жамал Өтегенқызы бұл қызметті абыроймен атқара білді. Артта қалған он жыл ішінде ел есінде қалатындай маңызды шаралар көптеп ұйымдастырылды. Әжелерден құрылған «Ақ әжелер» ансамблі облыстық фестивальде бас жүлдені жеңіп алып, Шардараның мерейін асырды. Осы ансамбльдің көркемдік жетекшісі Жарылқасын Мүтәлиева, ансамбль мүшесі, ардагер ұстаз Жаңылай Айдарова, басқа да зейнеткер аналар қауымы «Әжелер алқасының» абыройын асыруға өз үлестерін қоса білді. Қазіргі таңдағы «Әжелер алқасының» төрайымы, ардагер ұстаз Гүлзәкира Исаева да өзінің ізденімпаздығымен, жаңашылдығымен ұйым жұмысын жандандырып келеді.
Аудан әкімі Қ.Жолдыбай мен аудандық ардагерлер кеңесінің төрағасы Т.Бердібеков «Аманат» партиясының төрағасы Е.Бекет бір топ аналарға «Алғыс хаттар» мен сый-сияпаттар табыс етті. Әжелерге арналған мұндай марапатты аудандық мәслихат ұжымы да жасады.
Айтулы шарада облыстық ардагерлер кеңесі жанындағы «Әжелер алқасының» төрайымы Ф.Тілеубердиева мен облыстық ардагерлер кеңесінің хатшысы Б.Тәжібаева құттықтау сөз сөйлеп, аймағымыздағы «Әжелер алқасының» атқарып жатқан жұмыстары жайлы хабарлама жасап өтті.
Шардарадан бастау алған «Әжелер алқасының» форумы бекітілген кестеге сәйкес барлық аудандар мен қалаларда өтетін болды. Күз айында қорытынды жиын облыс орталығында ұйымдастырылып, «Әжелер алқасы» тарапынан ұйымдастырылған байқау мәресіне жетпек.
Іс-шара барысында «Әжелер жүріп өткен жол» тақырыбында көрмелер қойылып, зейнет жасындағы еңбек ардагерлері концерт қойды. Мектеп оқушылары әжелерге сыйлықтар үлестіріп, жыр-шумақтар оқыды, әсем әннен шашу шашты.
«Өскен өңір» – ақпарат.
