Қазіргі таңда мектеп жасындағы балалар жазғы демалыста. Алайда олардың демалысын мазмұнды өткізу тиісті сала мамандарының назарынан тыс қалған емес. Балалардың жазғы демалысын тиімді өткізу үшін ауданда спорттық-мәдени шаралар жиі ұйымдастырылуда.
Өткен аптада аудандық балалар саз мектебінің ұйымдастыруымен «Балалардың игілігі үшін» атты концерттік шара өткізілді. Шарада саз мектебіндегі үйірмелерде оқитын балалар түрлі аспаптарда ойнап, концерт берді. Концерттік шараға дәстүрлі ән, күй және түрлі аспаптарда ойнайтын шәкірттерін, мың бұралған бишілерін әкелген мұғалімдердің қарасы көп болды.
Олар ұлттық ән-күйден бөлек әлемдік классикаға айналған Бетховен сынды тұлғалардың шығармашылығын күйсандықта жоғары деңгейде орындап шықты. Онан бөлек домбырашылардың күйлерді шебер орындауы тыңдармандарды риза етті. Би үйірмесінің қатысушылары түрлі ұлт билерін дөңгелене билесе, вокаль үйірмесінің қатысушылары әуелете ән салып, көрермендерге ерекше көңіл-күй сыйлады.
Аудандық балалар саз мектебінде 740 бала 11 бағыт және 42 сынып бойынша оқиды.
«Өскен өңір» – ақпарат.
