Шілденің 7-8-9 жұлдыздарында «Өнерлі өлке» облыстық өнер фестивалі аясында Шардара ауданының Түркістан қаласындағы мәдениет күндері өтті. Мәдени шараны қала тұрғындары мен қонақтар тамашалады.
Ауданның мәдениет күндері Этноауыл аумағында «Шежірелі өлке өрнектері» атты қолөнер, қылқалам шеберлерінің көрмесімен басталды. Сонымен қатар «Шардара-Армспорт» клубының арнайы көрмесі, «Сыр шерткен Сырдың қойнауы» атты Шардара аудандық тарихи өлкетану мұражайының көшпелі көрмесі мен «Түркістан – текті төріміз» атты кітап көрмесі жасақталды.
Шардаралық шеберлер шара барысында киіз басу, құрақ құрау сынды қолөнер бұйымдарының жасалу технологиясынан туристерге мастер-класс өтті. Алтыбақан аясында «Сахара сазы» атты ақындар айтысы мен «Халық әні – қазынам» халықтық фольклор өнері көпшілікті тәнті етті.
Күн соңы «Салт-дәстүрім – алтын қазынам» атты әдеби-сазды композициялық қойылымымен аяқталды. Аталмыш қойылымда ұлттық тағамдар көрмесі, ұлттық киім сән үлгілері, «Баланың бауырынан табақ жүгірту», «Тұсау кесер», «Біз шаншыр», «Шеге шапан», «сырға салу» және жас отауды қолдау сынды ізгі дәстүрлер көрсетілді.
8 шілде күні «Visit Turkistan» орталығы алаңында «Жайнай бер, шағалалы Шардара!» атты аудан көркемөнерпаздарының қатысуымен гала-концерт өтті. Кешті жүргізуге пародист, әнші Сырымбет Бибосынов және Ырысбала Икрамбай арнайы шақырылыпты. Кешке сазгер, әнші Қазыбек Құрайыш, Мөлдір Бақытжанқызы, Айзада Әлімбек, Ибрагимовтар отбасылық ансамблі, Шахзод Сана, Лұқпан Байқожа, және тағы да басқа ауданнан түлеп ұшқан өнер жұлдыздары қатысып, әсем әннен шашу шашты. Әлеуметтік желі арқылы бүкіл елге танылып үлгерген 5 жасар математик Ислам Қанатбекұлы есепке жүйрік қасиетімен көпшілікті таң қалдыра білді.
Өнер фестивалінің үшінші күнінде Этноауыл аумағында Шардара ауданы диқандарының ауыл шаруашылық өнімдерінің көрмесі мен «Ұлттық ойындар – ұлттық тәрбие құралы» атты спорт түрлерінен сайыстар өтті.
Қала тұрғындары мен қонақтары ұлттық спорт ойындарынан, атап айтқанда қазақ күресі, қол күресі, арқан тарту, гір тасын көтеру, ләңгі тебу, қошқар көтеру, бесасық, асық ату, тоғызқұмалақ сайыстарынан бақ сынап, жеңімпаздар бағалы сыйлықтармен марапатталды. Сонымен қатар Шардара ауданы диқандарының ауыл шаруашылық өнімдерінің көрмесі жасақталып, көпшілікке таратылды.
Рүстем ПЕРДЕБЕК.
