Қыркүйек айының 08-11 күндері аралығында Өзбекстан Республикасының Ташкент қаласында каратэден балалар, жасөспірімдер, жастар арасында әлем чемпионаты өтті.
Дүниежүзінің әр түкпірінен жиналған кіл мықты каратэшілер арасында өткен жарыста еліміздің намысын қорғаған спортшыларымыз 1 алтын, 1 қола алқаны қанжығаларына байлады.
Атап айтар болсақ, балалар арасында 38 келі салмақ дәрежесінде бақ сынаған спортшы қызымыз Әбдірасыл Айзере қарсылас шақ келтірмей, өз салмағының үздігі, әлем чемпионы атанды. Сондай-ақ, 50 келі салмақ дәрежесінде Кенжебек Нұржан үздік үштікті қорытындылап, әлем чемпионатының қола жүлдегері атанды.
Жүлделі орындарға ие болған спортшыларымыз бен олардың жаттықтырушысы Батырхан Әділетті жетістіктерімен құттықтай келе, алдағы уақытта да тек жеңіс тұғырынан көріне берулерін тілейміз!
«Өскен өңір» – ақпарат.
