Сәрсенбінің сәтінде Шардара аудандық ардагерлер кеңесінде аудан әкімін сайлау жөніндегі үгіт-насихат шаралары өткізілді. Атап айтқанда, аудан әкіміне кандидат Арман Қарсыбаевты қолдау бағытында құрылған штаб мүшелері аудан ардагерлерімен кездесу ұйымдастырды.

А.Қарсыбаевтың сайлауалды штабының мүшелері ардагерлер алдында сөз сөйлеп, үміткер азаматтың сайлауалды бағдарламасын жан-жақты таныстырды. Ардагерлер кеңесінің төрағасы Т.Бердібеков, “Amanat” партиясы аудандық филиалы төрағасы Е.Бекеттер кандидаттың қызметтік жылдарына тоқталып, алдағы уақытта жоспарланған бағыты мен бағдарына тоқталып өтті.

Кандидаттың сенімді өкілі М.Шамиев А.Қарсыбаевтың ел алдындағы абыройы мен беделін жан-жақты саралап, еңбек ардагерлерін оны қолдап дауыс беруге шақырды. Аудан ардагерлері А.Қарсыбаевты қолдайтындықтарын білдіріп, оған ақ батасын берді.

Жиналыс соңына қарай аудандық ардагерлер кеңесінің төрағасы Т.Бердібеков бірқатар ардагерлерді марапаттау шараларын өткізді. Атап айтқанда ардагерлер кеңесі төрағасының орынбасары Б.Рахматуллаев пен еңбек ардагері Т.Бектастар «Құрметті ардагер» төсбелгісіне ие болды. Нұрбас Иса мен Ахметжан Нұралиев Семей полигоны зардабын жоюшы ардагер ретіндегі төсбелгіні алса, Т.Мырзагелдиев облыс әкімі мен аудан әкімі Алғыс хаттарына ие болды. Сонымен қатар Қ.Сермаңызов, С.Жантөре, Б.Жиренбаев, С.Қуан, Т.Сабырғалиев, Д.Өзденбаев, Қ.Ештаев, Е.Тұтқабаевтар аудан әкімі атынан Алғыс хаттармен марапатталды. 

Өз тілшімізден.